Nau awm leh T.V. (ka fapa atanga ka hmuh ve dan)

Mi in fa tamtak enkawl seilian a tu leh tuchhuan te hmel hmu a an awm laiin fa pakhat chauh pawm hian hre ber awm zia zangin ziak ve leh tawp teh ang.

Fa te awm chawt tur hi chuan hman a ngai khawp mai. Tunlai chhanah hman tak hi kan vang tawh bawk sia, fa pakhat aia tam nei te tan lek phei chuan hman hi a theihloh tluk a ni deuh thaw.

Zir mi thenkhat chuan “T.V. hi nauawmtu-ah hmang suh” an tih laiin hmanloh chu har tak a ni. T.V. en a an tlei chhungin nu in hna tam tak a thawh hman tlat si avangin min tibuai lova an lo en theih chuan fuh ve deuh mai asin.

Chutih laiin an thil en erawh thlan fimkhur a tha.

Tunlaiah thenkhatin “Chhota Bheem - vai pathian thawnthu” tiin an sawisel a…vai pathian chanchin hriat hi keima ngaihdan chuan a pawina ka hre lo…powers an neih te pawh hi, anni aia Isua/Pathian powerful zawk zia hrilh hriat nan a tha letling ka ti…An sawisel lehna pakhat “an sap tawng hman a vai” tih hi kei chu ka sawisel miah lova. India ram kan awm chhung hi chuan vai accent (hing-lish) deuh pawhin lo tawng mah ila a pawina em em ka hre lo, mahse a duh lo tu tan chuan entir loh mai a tha.

A chhan chu hetiang an en atang hian accent hi an zir tak tak reng a. Example-ah ka fapa pe ta i la. Mak tak maiin Chhota Bheem hi a en duh lo tlat a, mahse sapram lam cartoon a en tawng chi (tawng chi han tih ah Tom&Jerry angah te hi chuan tawng awm em em lovin an chezia hi a ni deuh ber a) hi chu Ben10, Kid vs. Kat, Thomas and Friends, Mickey Mouse Club House, Pooh Bear etc etc. te hi a nia…an accent anga tawngin sap tawng a tawng nalh a, mahse an swear ang ten a swear ve leh zel thung a, “Cat” hi “khettt” a tih deuh tralhh tralhh laiin Ben10 te style takin engemaw hlekah “Oh mannn!” tih te a hrat em em bawk.

Ka fapa hian Disney Chanel ah Doraemon a en thin a, Hindi a dub vek ania. T.V. a cartoon chhuak zawng zawng-ah a en duh ber a ni tlat. Tunah hian Hindi hi a tawng hman nuam tih ber ania, a thiam lutuk, a grammar pawh a dik thlap a, a lam/thluk dan (accent) pawh a dik vek…hei hi pawi ka ti lovin ka lawm em em zawk…Mizo leh English te hi chu an thiam tho tho dawn a, India ram a kan awm chhung hi chuan Hindi thiam hi a pawimawh bakah kan kal thui tulh tulh a Hindi thiamloh chu buaina ral lenna a ni ringawt L.

Heti thleng chauh hi ziak hrih ang…nakinah remchang a la chhunzawm leh atan

A fair bik lo e!

“St.  Pauls admission sang lutuk hi a dik lo, ti hniam ve rawh se, school dang admission nen a in to hleih lutuk” an ti sup sup a.

Khawvel khawi hmunah tak hian nge, ram changkang leh hausa a ni emaw ram hausa lemlo pawh ni se la, school tha ve deuh leh tha vak lo te, school hran hran-te hi, an admission man emaw an thla tin fee emaw a in an re re le?? School tha ah chuan a luh man a to mai chu thu dang nise  lut tur pawhin test chi hrang hrang te paltlang a ngai fo a ni lawm ni?

Bazar-ah pheikhawk lei turin kan kal a, a to deuh te, a tlawm deuh te a awm a. A to lei phak chuan an lei mai a, lei phak ve lo chuan a tlawm an thlang mai. A then a tlawm avangin pheikhawk nalh zawk leh a siamtu company pawh changkang leh lar zawk te siam chu “ti tlawm ve rawh se” kan ti ngawt ngai chuang hlei nem, “a nalh zawk bakah a tha zawk sia, a siamtu company pawh company lar ania, an ti to zawk anih hi” kan ti mai thin.

St. Pauls School that lohna hre em em leh sawi chhiat hrat deuh deuh te hi a lut ve lo te hi an ni chawk. St. Pauls a lut thin emaw lut mek emaw te hian an school chanchin an han sawi chang hian an fak mai a, school dang chhiatna an va sawi kher hi ka hre khat khawp mai, an school fak na an sawiah khan an duhtawk mai zel ania. Enga tinge school dang atanga zir chhuakte leh school dang a zir mekte hian St. Pauls hi an sawichhiat fo mai le? Kal dikloh na laite emaw tihsual te chu an nei ve em em ang a, mihring enkawl a ni miau va, mihring chu diklo thei kan ni bawk nen. Mahse an zirna school emaw zir thinna school emaw fak a duhtawk mai lova St. Pauls thatlohna an han sawi tel hram thin hi chu enge a chhan ni ang aw?

“An school naupang ho zia a mawilo lutuk, bus ah chuang se midang hmaizahna nei miah lovin bengchheng an siam a” an ti. Aizawl a school dang te hi an school bul-ah bus stand hmasa ber hi awm ve ta se, bus-ah khan an school naupang deuh hlir chuang khat ta thup se, an zia a mawi bik viau angem aw tih hi chu ngaihtuah tham tak a tling asin. Republic Day emaw Independence Day emaw a Sipai Lammual a function a school dang zirlaite an tei kual mai mai laia St. Pauls zirlaite hmun khat a an thu khawm thap thin te hi fakna ri hriat a va khat em.

Hetiang reng te hi chu a, a fair bik lo e!

Lunglen

Hmanah Pu Vanneitluanga ziah hi emni ka chhiar tak kha aww “lungleng mi chu nupui/pasal neih tawh leh tawhloh lam a ni lo, thla en te hian lung hi a leng vawng vawng mai a ni” tih lampang deuh a a ziah kha.

Mi lungleng mi ka ni e chu ka ti dawt bik chuang lova, ‘marawhchu ka han titi vel hian ‘mi lungleng mi tak i ni e’ titu hi ka tawng ta fo mai.

Mak ve deuh mai chu mihring nunna nei hi ka ngai ngai miahlo…ti ila dawt sawi ka ni awm sia..ka ngai khat khawp ti ila chu a dik chiah thung. Pawl 10 kan pass zawh khan pawl 11 zir turin a vawikhatna atan Mizoram ka chhuahsan ve a, ka chhungte ngai hian ka lung hi chhete eih hian zu han leng miah lova mawle. Hei hi hmangaihna ka neihloh luat vang nge? Ka hrethiam tawh bik lo.

Ka pi in kum 2000 September ni 19 a min boral san hnu khan ka ngai nasa ta em em thrin a, kha kha mihring ka ngaih ve tak tak intranna chu niin ka hria. Mahse min boralsan hnuah chauh a ni.

Chumi tih lovah chuan ka pasal hi (kan inneih hma atrang daih tawh khan) ka han ngai thei laileng khawp a, a chanchin ka sawi ngaithla peihlo kha chu kawm pawh ka kawm thra peih ngailo. Kan inneih hma kum 7 dawn kan inhriat chhung khan, mobile phone te kan neih ve tak hnuah pawh khan, min rawn phone a a hming ka mobile ah a rawn det zeuh zeuh hian ka lungphu te hi zuk la dang vek zel a mawle. A lo atchilh theih thrin ngar ngar teh e :D

Engpawhnise lunglen lam bawk chu sawi leh ta i la, ka lunglenna te hi mi tam tak chuan ho leh nep an ti thrin tih ka hria. Ka lung an len ve miau sia.

Ka lung ti leng em em tu threnkhat te chu:

1. Ni sat vel vawl ni a ralkhat a bawng bu ull ulll ri te, ar khuang al all ri te

2. Ruah a han sur a lei huh tantir rim nam veng veng te

3. Thla bial eng em em mai te

4. Krismas hla (kumtluan in ka ngaithla peih…ka lung hi an len em em ringawt)

5. Nihawi par…kumtawp dawn hnaiah nihawi par vul chukk ka hmuh hian ka lung a leng ziah

6. Chawlhni tlai…vairam ka awm tirh kum 12 kal ta atrang khan tun thleng hian Sunday tlai chawhnu lamah hian ka la nghilh dup ngei ngei

Ka zahna thin kha a va lo ho teih teih

Class 8 ah khan Section A, B, C, leh D te a awm a, kumtir school tan ni chuan section tin kawngka ah khan khami section a awm tur te hming list an lo tar a, mahni hming awmna zawngin kan buai ve nak nak hlawm khawp mai. Zah nen, laih nen, inti high school rap ve tawh tak bawk si kha.

“St. Pauls te chu thiamthei luhna alawm” an ti a, a then in “St. Pauls te chu a nei fate luhna a ni” te an ti bawk. A then chuan “Katholik nih phawt chuan luh a harsa lo” te an lo ti a. Ka thiamthei lo, a nei fa lah ka ni hek lo, Katholik kan ni lo zui. Mahse ka lut ve tho mai.

St. Pauls a kum thum lehkha ka zir chhung khan uniform kha a hlui ka hmang tluan thrak. Ka nuteii’n ka luh ve hma deuh kum khan pawl 10 a lo zir chhuak tawh a, a pawnfen, necktie, kawnghren, leh kawrlum hlui te kha lawm takin ka chhawm chhova, kamis erawh ka pi in bazar second-hand lane sangha zawrhna bulah min lei sak.

Pheikhawk pawh kha a thar kan lei a, Pu Chhuantea (kan thenawm) a mi te dawr (Eros Tailoring bul) ah kan lei a. Kha ka pheikhawk kha rubber nal ang deuh chi hi a nia. Mizoram ruah tui tam bawk si ah khan pawl riat kan zir kum tawp lamah phei kha chuan a chhip te kha a pawp deuh rouh a, ka va han zak thei tak em. A thar lei na man kan nei lo tih ka hriat avanga ka dil ngam loh te kha. Ka classmate thenkhat leh kan school a lut ve te pawh khan ka pheikhawk kha an en a, an in hrilhru thin tih ka hre reng. Mahse engmah tih theih ka nei si lo.

Mawza pawh kha a thar kan lei ve ngei. Mahse kum tawp kan thlen hnaih meuh kha chuan a elastic te kha a lo ruull ve ta deuh va, pen pah khan chawnah a tawlh thla perr perr thin a, ka chawnah rubber-band ka bun chhova, ka mawza tlang khan ka thleh hnan thin. Miin an hmu ang tih ka va hlau thei mai mai tak.

Vanneihthlak takin pawl 9 kan zir kum khan kan school khan Bata a mi Naughty-boy-shoe kha an kharchhawng (emawni) teuh mai a, ‘school a mi chauh pheikhawk lei tur, hemi bun lo chu hrem an ni ang’ an ti a, ka pheikhawk hmawr pawp pawh bun thei ta lovin pheikhawk thar chu kan lei ve ta a. Kha kha pawl 10 ka zir thleng ka ring ta.

Pawl 9 kan zir lai khan kum tawp lam deuhah school chung atangin kan tla thla zuiah. Ka thi dawn emaw an tih vek laiin Pathian khawngaihna zarah tun thleng ka la thaw ve zel a, mahse ka tlakna ah khan ka ha te ka sawh bal a. Dentures ka hmang te kha ka zak thei lutuk a, mi hian “ha lem a vuah” tih melh hian min melh in ka hre thin.

Pawl 10 kan zir kum tir lamah khan ka thiannu pakhat chu school dangah a insawn ta daih a. A kawrlum hlui kha min pe a, ka tan chuan lian deuh mahse kawrlum thar (hlui) ka nei kha ka lawm bawn tawp.

Kan han puitling chho a khawvel te kan hre zau ve zel a, khatih hun lai a uniform thar tha tak tak neih khan nun ah hian awmzia a lo neih thui loh zia ka han hmuchhuak chho ta zel chu ania. Chutah kan ngaihsan leh kan star em em movie star te leh zaithiam te, model tih ang reng te pawh hian an hmel tih that nan hian ha lem an lo vuah fer fur tih te ka han chhiar a.

Tikhan lo zak in hrehawm lo ti viau thin mah i la, thil nuam tam tak kha a awm ve tho va, ka ngaihtuah let leh pawh hian ka high school kal lai kha nuam ve tak chu a ni tho mai. Khatiang hun lai a ka zah leh hrehawm tih thinna kha tunah chuan ‘ho’ leh ‘nuihzathlak’ mai an chang ta. Engkim hian a hun te te hi an nei ve zel. Tunah chuan khatiang te kha a va han ho teih teih tawh tak.

kan rawt ve chhin

“Huiham! Mizoram vei hi chu a, awmzia a va han awm lo tak em” te kan han ti vel ah. Mizoram leh Mizo te ‘vei’ hi Mizo zingah kan tam khawp mai. Thianpa Zothana phei chuan “tlak duah hian awmzia a awm lo, sawi duh apiangin kan sawi a, ziak duh apiangin an ziak a, engmah a tak a tih awm mang si lo” te a ti fo. A sawi dik fu.

Mah re re se, mi tu emaw in an lo hman tangkai theih tak hlauh in rawtna tlem kan ziak ve leh hram teh ang.

Thalai dinhmun
“B.A. awm awl, M.A. awm awl” te kan tia, sorkar hna hnuai hnung ber pawl a kan ngaih Fourth Grade hna ruak hnawh khah in beisei ten kan in tlar cham pet put a. Hna ngaihsanawm lo a kan ngaih te hi thawh kan tum tlat lo. Hmanni chu facebook ah mi pakhat nen kan ram riang te lo that zawk nan tiin kan in hnial dun bap bap a “hna tam tak sorkar hna kher lo thawh mai tur” ti zawnga ka han sawi khan “hetiang hna te chu a tulna in a nan loh chuan tunge thawk duh ang” ti zawng deuh hlek hian a sawi a….hna neilo a awm a chhungte chawm hlawm nih baka tulna in a nan a awm dawn em mawni le???

Eizawnna/Sumdawnna rawtna

1. Istiri nawh
Vairam ah te chuan khawi khawi emaw kawng sir ah “istiri wallah” hi an awm fir fer kan hmu fo. An eizawnna hi capital invest tur a huphurhawm lutuk lo a sin.
(i) Meihawl istiri
(ii) Dawhkan
(iii) Dawhkan puanphah
(iv) Dawhkan chunga sarang engemaw zar tur
(v) Meihawl

Ti hian business a start nghal thei der.

Thawmhnaw nawh chhung te hi hun a duh ve reuh sia mi engemaw zat in hetiang hi an awm ngat chuan kan nawh tir duh ngei ngei ang.

2. Motor tifaitu
Motor nei hi kan tam tial tial a, a tihfai lam erawh kan hman lo tual tual thung. Helai mi motor tifai a inhlawh thin pakhatin min hrilh dan chuan thla khatah motor pakhat tihfai man cheng Rs. 200/- a hlawh thin. Zingah mi inah a va kal a, motor chahbi a la a, bucket ah tui a khai a, pawnchhia a nei bawka. Chumi hmang chuan motor chu a tifai a. Zing tin tihfai chuan tui tam tak nen a sil vak te kha chu a khat tawk chauhvin a ngai.

He eizawnna hi start dawn a mamawh te:
(i) Bucket
(ii) No pui
(iii) Pawnchhe pahnih (pakhat a huh tur, pakhat a ro tur)

A bak motor chhung vacuum fai an duh te nih chuan a vacuum cleaner te kha chu a motor neituten an ngaihtuah tur. Car chhung han brush fai vel na tur pawh motor neitu in a ruahman mai ang.

Mizo te hi chu kan ngam huai deuh bawk a Rs. 300/- emaw Rs. 400/- emaw in thla khat atan in chhiar ta se. Helai vaipa in tuk khatah motor 10 vel a tihfai theih chuan Mizo pawhin thei ve ngei turin ka ngai. Anih chuan Rs. 300/- pawh lo ti ta se, thla khatah Rs. 3000/- a hlawh der dawn a ni. Chu pawh zing hna thawh chauh a nia. A duh leh chhun lamah “istiri wallah” a ni tel thei bawk :D

3. Bawlhhlawh paih
Hei hi tunlai engtin nge tihdan ka hre chiah lova. Hmanah kha chuan bawlhhlawh paih motor kha a lo kal a, dar an rawn thing ri chhang chhang thin. Mahse kawngpui an a awm ve lo te tan chuan awmzia teh chiam a nei ngai lo.

Helai a mi bawlhhlawh paih tu hi zing tin an rawn kal a, bawlhhlawh zawng zawng kan pe a, thla khatah Rs. 50/- hlawh thin kha hmanni deuh khan an rate an san a Rs. 60/- an hlawh tawh :D. Bawlhhlawh kha kut a khawih vak pawh a ngai lo, saiip an rawn keng a, an hawng a, bawlhhlawh kan chhung lut mai. Kha a khawn khawm sa kha sorkar bawlhhlawh paihna ah a paih emaw bawlhhlawh paih motor lo kal hunah emaw a lo pe tawh mai dawn a ni. In tin in bawlhhlawh kan nei a, chhungkaw tin kha a customer an ni thei vek. In 100 atang pawhin khawn khawm se thla khatah chuan Rs. 6000/- a hlawh der. Hei phei hi chu hunbik em em pawh a ngai lo, chawei lai leh zanrei a nih ngawt loh chuan eng hunah pawh a va khawn thei.

Business start nan a mamawh te:
1. Saiip ruak 40/50 vel
2. Thela gaddi (thre-la gaa-ri) a neih theih chuan a hna a awlsam deuh saw tang

4. Thirchhia/Burchhia/Um
Hetah hi chuan saiip ruak chiah a mamawh. Mahse a customer lam hi a defined chiah lo thung a, vah kual tam te a ngai ang a. Chu bakah a thla tin lakluh tur hi chhut thiam mai a har deuh

Heng lo pawh hi tam tak a awm ang a, heng ka sawi te pawh hi sawiselna tur leh a thatlohna lai hria in awm teuh ang. Enge in ngaihdan min lo share ve re re teh u.

Heng ka sawi ang te hi thawk duh an awm chuan in an business start na tur thil eng eng emaw bakah khian rinawmna, taimakna, leh tumruhna chiah an mamawh tawh. Nu leh pa chawm hlawm nih ai chuan tha deuh mai a nia.

Ka hlimna thuruk ka hrilh ve ang che

"Aw Lalpa, chaw leh thil tinreng,
Min pek avangin ka lawm e.
I rawngbawl turin min pui la,
Isua Krista hming avangin, Amen."

Mizo zingah hian kan tawngtaidan emaw, tawngtai thiamdan emaw, hmasa ber han in zawt ta i la, "Aw Lalpa, chaw leh..." tih hi kan thiam hmasak ber ani deuh fur lo'ng maw?

He tawngtaina tawite kan sak thin hi a tam zawk chuan kan bai-haat a, kan sa liam puat mai a, a thu lam ngaihtuah em em lovin, tawngtailoh aia tawngtai tih ang deuh hi a ni ber mai.

"Zaninah min veng la,
Lalpa, kan thil hlauh a ta.
Vantirhkohten min veng rawh se,
Khua a var leh hma chuan, Amen."

Zan mut dawn tawngtaina hi kan han sa thiam chho leh a. Hemi kan thiam hi chuan Lal tawngtaina pawh kan thiam tawh tlangpuiin ka ring.

Chutah zing tawngtaina hi chu thiam lo pawh kan awm nual thung. Hetiangin:

"Ka chhandamtu nilengin,
Ka kiangah awm reng langin,
Sual lakah min hum fo rawh,
Thu tak sawi min zirtir rawh.
Thinlung thianghlim min pe la,
Thihna tihbai thlen hunah,
Isu, kei mi la ang che.
I hming ka fak fovang e, Amen."

Hetiang tawngtaina lam ka han sawi deuh duah na chhan chu. Tunlai ka nun leh ka hun tawn vel chungchang thil daih a nia.

"Tawngtai" han tih mai hian ka hriatthiam ve dan chuan "lawmthu sawina, chawimawina, leh dilna" te hi a awm in ka hria. Mahse mi tam zawk hian "tawngtai" kan han tih hian "dilna" lam hi kan bei uar-in "tawngtai" chuan "dil" tur ni hian kan in hre tlat in ka hmu a. Hei hi ka ngaihdan mai mai, a diklo maithei. Keima nihna thin chu a ni chiang bal bal.

Ka han tawngtai re re hian, "Aw Lalpa, chumi khami chu min chuti sak la, ... la, ... ang che, etc etc etc ...." tih lam hlir hi a ni thin.

Tun kum tir lam deuh khan tumkhat chu ka tawngtainaah hian "Aw Lalpa, I thu thu ni rawh se, nang lo lal ber la, I duh angin ro lo rel ang che aw" ka tia. A mak khawp mai, khami ni leh a hnu zelah khan ka nun kha a kal tluangin engkim kha a dik ta thlup thlup zel mai a. Ka rilru te te chuan, "E he!! ka bei fuh ngar ngar hle mai. Engmah dil tawh miahloh tur anih hi. I thu thu in han ti leh hmiah zel i la, kan hlim leh lawm duhtu ber a ni sia, nuam kan tih dan zawng deuhvin ro a rawn rel leh thlap mai ang" ka tia, duh ka neih deuh pawh kha ka dil duh ta re re lo mai a. Hahaha...ka phakar khawp mai. "I thu thu" hi ka han ti jaih jaih zel a, a tihchi zia kha ka man tlat tawh. Dil tawh dawn lo rengs, hi ni tawp mai ni :D .

Hemi hnu thla hnih velah khan aniang, ka rilru a ka tawngtai mawlh mawlh lai hian lawmthu sawina tur hi ka rilru ah a rawn lang a, "Lalpa, khatia min tih sak avang khan ka lawm lutuk ania" ka han ti chhin a leeee...."I thu thu" tih mai ai khan a thawk hlawk zawkin ka hria. Lawmthu sawi kha a lo powerful khawp a, engmah dil lo, i thu thu tih jaih jaih pah a lawmthu han sawi per per bawk kha chuan, duh ve deuh, dil chak et et, mahse dil tak loh te kha min rawn tih hlawhtlin sak leh ta par par mai. A van happening tek tek tak e awwww....Hetiang thuruk hi ka lo hre har lutuk hi pawi ka ti takzet. Mahse tunah chuan ka hre tawh bawk a, tawngtaidan style hi change let leh mai mai hi ka tum tawh lo re re :D.

Mahse, ka la man loh chu hei hi a ni ta a ni, "Chawimawina" hi....Engtin nge han tih dan vak tur ka hre tlat lova, a chang hi chuan ka rilru hian fakna hla te hi ka han sa ve a. A ri a ka sak chang lah hian ka zaithiamloh leh ka aw nalhloh em avang hian mi beng te a kham ang tih ka hlau bawk nen. Hei bak lo hian ka la chawimawi thiam tlat lo mai. A hre deuh in awm chuan suggestion min lo pe ta che u.

A bik takin "tawngtaina" ah hian engtin nge ka "chawimawi" ang? tih hi ka zawhna lian ber chu a ni a. Ka kap thelh deuh maithei. Chawimawi chu tawngtaina ah a tel lo zawk em ni? Chawimawi chu thiltih a lantir tur nge? Engtin nge? Min lo hrilh hre ve, please.

Kan Swimming Pool

India ram khawpui chu a ni ngei alawm, mahse nipui a han thaw a, khua a lum tan phat atang hian power supply hi a tho a ta thin a. Khaw lum a nasat pouh leh power cut a tam a, keini citizen lu mum, sorkar lam a thu nei ve lo ak zat-hnih hnuai lam tan hi chuan thlan hluam a, thinrim hlur a thut bak tih vak ngaihna a awm thin lo.

Hetiang hunah hian zirlaite hi an lainatawm lehzual in ka hria. Nipui zual lai hi final exam lai nen hian a in nang deuh zel mai bawk sia. Lehkha zir ngai bawk, eng awmlo bawk, khaw lum bawk. Rilru hi a bing mup mup duh viau ang.

Tun kum nipui do huai nan kan pa'n swimming pool lei a rawt a. Kan lei ve hmiah. A effective em em mai lehnghal a, a tihchi tak tak a ni.


Kan Lalengmawia hian nuam a ti ber mai. A ke hnuai dang lepp khawp hian tuiah a cheng peih mawle. A hmaa a chenna thin nen hi chuan a in nawm hleih ve hmel bawk em a ni.

Naupan lai thunawi

Tunlai chu kan naupan lai te ka ngaihtuah chhuak a, lung a leng rum rum thei alawm mawle. Eng eng emaw kan ziak ve mai mai teh ang. Hman hun leh a rau thawh hun a chhunzawm zel atan....

Community Hall ah khan badminton court a awm a, kha kha chuan mi a influence ve hle in ka hria.

Khel thiam tak tak leh thiam em em lemlo ten an han khel thinah. Keini hall opposite ah, kawmthlang Pu Chawngluaia te in chhukthlakna ah khan kan khel ve a, racquet atan school note-bu kawm khawng ngei kan han pawtthla a, shuttlecock lah hall a inkhel ho hman duh loh an paih kan han chhar khawm a. Hall chhungah court sir a kan han khelh ve trum te kha. A chang leh kan shuttlecock chhe lutuk kha kan zahpui a, kan hlap vak tum a court chhung a a tlak in kan han chhar zak vel thin lai te kha.

Kawmthlang Pu Biaka te April kung mawlh mai kha. Kan lawn a, a zarah kan thu a, kawngpui bul mai a awm kha a nia. A kung a buk si, kawngkal in min hmu thei si lo, kawngah mi an chhuk/chhoh khan, thingkung zar atangin "peuhhhhh...piuhhhh" te kan lo tia. Kawngkal kha an han hawi deuh he haw a. Keinin nuam kan lo ti ve em em a.

Pu Biaka (Biak Private-a, R. Lalbiaka) te khan telephone kha an nei alawm. Kan vengah khan a nei hmasa pawl kha an nia. An number pawh kha digit pali lek a ni ta in ka hria. A'u Mami (Pu Biaka tunu) khan phone a rik khan a han chhang a "Hello, 2664" a ti thrin ta in ka hria, tikhan telephone call kha an chhang ngei zel. Nawm hmel kha kan han ti thei mai mai khawp :D.

Chutah Telephone Directory a rawn awm a. Kan keu a, mi number kan en a, kan call a, call an rawn lak veleh "peuhhhh...piuhhhh" kan lo ti leh a. Va han nuam thin tak e awww. Mahse kan va call te kha chuan min ngei thin ngawt ta ve ang.

Zing tlan stage kha a lo awm leh a. Thlasik ah, kumtawp school chawlh lai vel a ni. Kan han riak khawm a. Zing tlan tum lutuk khan. Kan helhawlh kha dar 3 velah kan han tho a. Khua lah a vawt ropui si. Mission veng thleng thleng te kan va kal a. Ni khat kan tih kha chuan kan chhunzawm lehna kha chu kar khat hnu te a ni thin.

Tawngtaina

Muanna tam tak kan chan fo va,

Lungngaih, mangan, kan tuar thlawn.

Engkim ah Lal Isua ring a;

Kan tawngtai loh avangin.

Lalpa Isu, mihring ring lo a nangmah a rinna  nghat tlat thei tur in min pui ang che. Min hmangaihtu i ni, min hmangaih avangin kan lawm e. Kan hlim leh kan lawmna duh tu ber i ni. Kan tawrh i la phal hian min ensan lo a ni tih kan hria, kan lawm e. Kan nun atan kan duhzawng chauh dil lo a nangmah rorelna leh thuneihna pe pumhlum thei tur che in kan rinna min tih chak sak ang che.

Lalpa, sual kalsan a thil tha ti thei tur in chakna min pe la. I thlarau in min awmpui reng ang che aw. 

I khawngaihna  kan tan a tawk.

Lalengmawia video's

Post tur dang vak hre lo ta chu, post pakhat dan lek lek ah hian fapa chhuan em em hi post zel i la ni mai :D

Bucket chhung ah. Hetah hian thla 7 leh a chanve a ni.

A-pi nen. Hei pawh hi thla 7 leh chanve a nih lai.

Walker a drive kual lai. Thla 6 a ni. Background ah a pa in Uncle-Sena a bia :D

YZTP concert en pah in a lam.

Eng eng emaw

Miss J-i'n "i blog in changkhatna a ei em ni?" min ti...lolz...

Inspiration a awm lo ve bawk a...haha...ziah tur hlol ka hre lo a ni...blog update ka duh ve bawk si, han ziah em em tur lah a vang...a hming in blog ka nei ve ting tang bawk nen...kya karu?...

Pic eng eng emaw hi dah leh pop pop mai teh ang...blog a hmuar loh nan...a hming in (just name) :D

Delhi trang kan tlan phei a, Gurgaon luh dawn a "toll gate" hi a shap-ram style ve wriau in ka hria...hetiang a "toll gate" lian tham hi ka la hmu ngai lo a, keima hmuh ve tawk tawk ah wropui tham ka ti fu...

In colourful deuh...eng office tak ni maw?

Delhi Metro train kawng tur an sak lai mek

Happy Birthday-Lalengmawia Renthlei

Sam 127:3 - Ngaiteh, fanaute hi Lalpa laka kan rochan an ni a. Rila rah hi A lawmman pek a ni.

Hmanni lawk emaw tih laiin Lalengmawia pawh December 12, 2009 khan kum khat a lo tling ve der mai mawle. A birthday hmang tur in a pu leh a ni Aizawl atrang in an rawn kal a, chhungkua in hlim tak in chhang-kek zai na te nei in zanriah kan kil ho.

Pics ka dah nghal pop pop:

1. Birthday chhang-kek.


2. Aa-ni leh aa-u-dong-i nen


3. Family pic. Kan in bang hi tui a hnam a :( , paint a tla nual. Inchung an sa lakloh bawk si nen, siam ngaihna vak la awm rih lo.


4. Aa-ni in chhang-kek a zaipui don


5. Aa-pu in zai pui zok mai rawh se


6. An zai taaa


7. An in barh mek


8. I am my grandpa's grandson


9. Aa-pu in thu tlem sawi in tawngtaina a hmang

Insoitheihna

Update khat ngar ngar bawk a...ti ve leh hluai teh ang.

Nizan a kan pa kelsa siam hi a tui em a, blog ah ka rawn suah thren ve ang che u ka ti rilru deuh...


Hman ni deuh khan dining set kan lei thar ve a...a hlui leh tawh zok :) ... ka ron show ve duh mai mai ...insotheih nan :D

Sakhi lam peng ron zawh la

Assimilation hlauhawm zia kan sawi chhen a, kan hnam zia leh tihdan te chhawm nun zel a trul zia kan inzirtir fo bawk. Art & Culture Department te kan nei a, kan hnam lam te an in zirtir a, YMA ang pawh in an zir in an intihsiak ngun. Zai lam ah pawh Mizo musical instrument hmang a zai te an ti thar leh a. Chi hrang hrang in kan hnam zia chawm nun zel nan kan bei. Ramhlun North YMA Branch hi a thawh hlawk pawl tak chu an ni in ka hria.

Hnam zia chawi nun na kawng lam ka ngaihtuah ve thrin hi fa han neih meuh chuan a danglam ta zak mai.

**Pawnto: Kan pawnto nasat thrin zia kha. Tunlai Aizawl naupang tam tak hi 'Pawnto ang' ti i la, enge 'pawnto' hrelo hi an kat nuk ang em? 'Pawnto' chu eitur emaw ti mai tawk te pawh an awm ka ring deuh hial a ni. Nu leh pa te pawh hian fate 'pawnto' an phal em le...'pawnto generation' kha a thring deuh tawh nge mawni zawk...'Pawnto' hi a thra nge thralo?

**Nauawihhla: Alexx-a hian "kan hmuh hmuh kan chham a, kan zai a, nauawih hla a ni mai alawm" a tia...a dik khawp mai...mahse kan Mizo nauawih hla te hi a hmang duh tan engtin nge kan tih nun leh theih ang?. A thu ringawt ziah chuan a thluk dan kan hre leh awm bawk si lo a, a audio in emaw a video in emaw Art & Culture department te hian siam ta se, te ka lo ti mai mai a. Demand channel ah te hian dah se, a lar chak fu ang a. Youtube ah te upload se, Mizoram lam a awm lo te tan pawh. '...tlang ah ruahpui a sur e, sakhi lam peng rawn zawh la, rawn zangphar der der ang che...' tih ang te kha.

**Naupang lam hla hrim hrim: '...sikul ka luh tirh in, mikhual ang ka lo ni...' tih te kha...tlem tlem chiah ka hria a...sak chhuah theih ka chak lutuk...

**Thawnthu a hla: Mizo thawnthu a hla awm te pawh hi. Mizo thawnthu compilation bu chu a awm nual in ka hria a. Thriannu Jerusha hian Mizo thawnthu pakhat hman ah chat na ah min hrilh a, Chawngchilhi (emawni) nau in rulpui a auh hla kha 'ka sa thiam vek a sin' a tih ka la hre reng. Khatiang ang chi te, Mauruangi thawnthu ah te pawh hla ang a sak chi a awm nual kha. A tam in ka hria hetiang chi hi. Heng te pawh hi siam tel ta se, hlut deuh deuh tu kan tam fu ka ring tlat.

Tunlai chu heng vel hi ka vei ve tlatz :D

Taj Mahal ah kan va kal a

Hmanni chu kan pa uncle leh a colleague an hna lam a training tur in an rawn zin a, "Taj Mahal kan hmu duh e" an tia, ka nu kalpui kan lo duh ve bawk nen, remchang ah la in kal ho kan rel a.

Motor hire a kal tur nge ni ang a train in kan kal ang? AC train a awm em? Hun a duh rei ang em? tih vel te kan han ngaihtuah kual. Travel agent kan dawr fo thrin te ka va phone a, May 10, 2009, mother's day khan AC train a zing dar 5 vel a New Delhi railway station atrang a Agra pan a chhuak tur in ticket ka leitir.

May 9, 2009 a rawn thleng a, kan pu leh a thrianpa pawh kan in lam ah chawhma lam atrang in an rawn phei. Chawhnu ah office ka bang hma a, Gaffar Market, Karol Bagh ah kan han kalpui te te a, zanriah te kan in ah kan kil ho a, an riak. A tuk zingggg kar vai pathian thawh hma in taxi kan biak lawk in min rawn lam a, train station lam pan in kan chhuak ta.
A hma zan kan meng rei bawk nen, rel ah chuan kan muhil bawrh bawrh hlawm.

Darkar thum dawn kan chuan hnu ah Agra station chu kan thleng ve mai bawk a. Prepaid taxi hire tur kan han zawng leh. Air-conditioned Qualis kan hire a, Taj Mahal pan in kan tlan phei ta fua fua.

Gate thleng chauh motor a kal thei, khua lah a lo lum tran tawh. Matea leh ka nu nen kan pathum in cycle-rickshaw ah kan chuang a, mipa pathum erawh ke in an rawn phei.

Kan tlan phei a, Taj Mahal luhna ticket leina bul thleng cycle rickshaw chu kan chuang. Thei, mineral water etc etc vel an lo zuar, dawnfawh zailep sa plate khat cheng 10 man kan han ei leh te te.

Taj Mahal luh na tur ticket kan lei. A bulah tour guide ho an lo inzuar nasa. Pakhat in min zui tlat a, kan la ve thruai. An thatchhe em em mai lehnghal.

Matea a luck leh ta ber. Mi in an lawm thei lutuk a, 'thla kan lo laksak', 'kan pawm chung in thla kan lo lakpui', 'pawm u la thla i la ho ang u', titu te kan tawng ta nawk :D (nia, ka insoithei :D). Kan kal chak theilo, kan kal hlek a, lo lawm a lo pawt tu kan an awm zel. Matea lah intithei ropui, inti hmelthra vel, inti puitling vel, nui sawihh sawihh reng ringawt.



Kan pu te pahnih lah in a pa nih an inchuh deuh reng ringawt lolzz...

Chuti nek nek chuan Taj Mahal chu kan va thleng ve mai bawk

Agra chu lum bawn tops. Temperature pawh "...44 te 46 degree celcius te a ni zak zak e..." tih an sawi. Kan vannei leh zauh. Taj Mahal pan in kan phei a, Lady Diana seat an tih mai, Diana-i'n Taj Mahal a tlawh trum a lunglen hmel tak a thru a thla a lakna lai vel kan thleng tih in ruah a rawn sur hawk, rial a tla tel zui. Khua pawh a dai nghal sawng sawng.

Hi! I am five months old

Nimin, May 12th, 2009 khan thla nga a tling ve der. A pian pawh kha hmanni lawk emaw tih lai in, hun hi a lo kal ve zung zung mai.

Ka rai tih ka hriat tirh khan Pathian hnen ah ka nau pai kha ka hlan a, duh tam tak ka dil thrin a, ka dil te min pe a, ka lawm.

Dul ran hi ka hlau mai mai khawp a, a ran loh nan hian ka trawngtraina ah ka dil nasa thrin "nu te an chhun duh, nu te dul a ran chuan a rang duh" ti a min hrilh tu ka tawng nual. Ka nu lah hi a dul an rang nasa mai mai khawp a. US of A lam ah khuan a hnawih chi thra deuh a awm an tia, Alexx-a lah chuan an nu in a hman thu min hrilh, 'a rang miah lo' a ti zui. Pasal bulah kan sawi ve a, 'rang chi leh chi loh awm a ni, rang chi i nih chuan eng ang a thra an tih pawh hnawih mah la a rang tho ang' min ti hmiah mai bawk si. Engmah ka hnawih ta lem lo. A rang miah lo bawk.

Fapa hi ka awt lutuk a. Ka tawngtai apiang in ka dil thrin :D . Pathin in fapa hmelthra deuh min pe leh a. Ka va vannei tak.

Dam leh hrisel tak a thla nga lai a lo tling ve ta hi kan lawm a, Pathian hnen a i tawngtaina ah lawmthu min lo sawipui ve thrin tur in ka ngen che. Tin, keini a nu leh pa leh kan chhungkua pawh in Pathian duh zawng ang a enkawl kan thiam theih na tur in min lo dil pui ve fo dawn nia.

Camera thar kan nei

Kan phone cam a kan thlalak ve te, fahrah ti a hmusit tak tak tu kan tawn fo tawh hnu ah, tlai ngai lo Pa chuan ka pa kal tlang in camera min leisak.

Kan lawm lutuk a, camera thar neih zan phei chuan ha hni dai duk in ka thren thru reng ringawt.

Mahse, thla lak hi ka zei lo ve tops...kan in bul motor kawngpui a lirthei lian pui pui zan a tlan thrin ho kha thla ka han laksak chhin a, a phe emm emmm ringawt. Keimahni motor a kan chuan a, tlan chung a ka laak chu a fiah em em leh lawi bawk sia. Ka hriet thiem lo ve khuff mai.

Min lawmpui em em tur a ka rin Alexxfender ka zuk hrilh, min lo lawmpui, tips min pe nual bawk. "Khati chuan kan pawl ah i lo tel thei tawh a nih kha" min ti, "ka tel lo in pawl te in lo siam a maw?" ka tia, ka la thinrim hlur.

Intithei deuh in dultea ka han hrilh leh, "Nia, Alexx-a khan min rawn hrilh vang vang....Congrats" tiin min lo chhang.

Kan camera thar a kan thlalak threnkhat te: Matea kawr sen trial haak hi A-U-Abi te chhungkua in New Bern, USA atranga an rawn thawn. Tommy Hilfiger brand. Kan intithei hle :D

With A-pu
With A-Patea

Single pic te pawh

Hriatreng theihna

Hmanni chu ka high school kal pui thrin Dipti Wangu nen gchat ah kan inbia a. Amah hi lehkha thiamthei tak, high school kan kal lai pawh a exam na ah te top 10 a lang zak zak thrin, matriculation examination ah pawh (ka hriat sual loh chuan) top 10 a lang pha chin ania. Tunah chuan software engineer hna thawk in US of A lam ah a lo awm daih tawh chu ni in.

virgochhas: class 9 ah khan section khat ah kan awm ho thrin tiraw? 9 ‘C’ ah khan
Dipti: ka hre tawh miah lo
virgochhas: kan awm ho thrin alawm. 9 ‘C’, first floor, vei lam pang kil a classroom, sister Orswine kha kan class teacher a ni thrin a, a chhuak a, sister Teresa in a hmun a rawn awh taak kha
Dipti: e hee…i memory a va thra em em…chutiang engmah ka hre tawh hleinem..

MAK ka ti lutuk a. Lehkha lah a thiamthei ropui si a, khatiang mai mai te chu a lo la hriat ve ka ring a.

Ka naupan lai, kum 4 pawh ka la tlin hma a thil thleng te, nursery ka zir lai a thil thleng te, a vai vai chuan sawi vek thei lo mah i la, thil tam tak hi ka la hria in ka sawi nawn leh thei a. Ka ngaihtuah kir hian a hun lai a kan awmdan, kan paw-si te thleng hian ka la mitthla thei in la hriat vek ka ngah lutuk tlat.

Hetiang vek hi midang pawh an ni ve emaw ka lo ti char char a, normal emaw ka lo tia…A lo ni miah lo mai. Midang ka han titi kualpui vel a, mi hian thil hi an lo hre rei vak miah lo.

High school a ka class mate thrin, tun a ka thawhpui ni bawk, Bachelors ah Psychology a gold medalist hnen ah ka sawi a. Min han explain sak ngial. Mihring hian kan thil ngaihpawimawh zawng chu kan hre reng a, kan ngaihpawimawh lem loh chu kan theihnghilh zung zung e’ a tih chu..'Nang chu ngaihpawimawh i ngah a, I hre reng hnem a nih kha’ min ti.

Chu chu a thra nge a chhia’ kan ti leh hraam a. ‘A thra alawm, i thluak I hmang nasa a, a thra’ tiin min chhang.

Nang thil hre rei chi nge i nih theihnghilh liam puat chi?

Glory to His name!

Yesterday, today, forever,
Jesus is the same.

All may change, but Jesus never!
Glory to His Name!

Glory to His Name!
Glory to His Name!

All may change, but Jesus never!
Glory to His Name!

blog thar...blog thar...

khaih khaih khaihhh...

ngun takin lo ngaithla wroh u le...ka blog hlui pahnih ten mual an liam hnu ah, blog thar ka nei taaaa...ka blog sir dinglam ah hian tu tu emaw te blog link ka dah pop pop mai, an phalna ka dil lem lo...phal tur a ka rin vek an ni...an phal loh thu min hrilh vaih chuan ka la thla leh mai ang...tin, website te pawh ka dah e...lo en ve chhin hlawm teh u....khaih khaih khaihhhh...

tin, ka blog a in blog link dah ve tur a min duh chuan min hriattir dawn nia...

khaih khaih khaihhhhh....